भारतले निजगढमा विमानस्थल नबनोस् भन्ने चाहेको छः मन्त्री पोखरेल

निजगढसमाचार, काठमाडौं, ३१ कात्तिक

पर्यटन तथा नागरिक उड्डयनमन्त्री आनन्दप्रसाद पोखरेलले छिमेकी मुलुक भारत बाराको निजगढमा दोस्रो अन्तराष्ट्रिय विमानस्थल (एसआइए) बन्न नदिने षड्यन्त्रमा लागेको आरोप लगाएका छन् ।
सोमबार पर्यटन पत्रकारहरुसँग भएको छलफलमा मन्त्री पोखरेलले विमानस्थल बन्न नदिनकै लागि फास्ट ट्राक र विमानस्थल एउटै प्याकेजमा बनाउने प्रस्तावहरु अघि सारिएको बताए ।
   ‘दोस्रो अन्तराष्ट्रिय विमानस्थल साउथ एसियाकै महत्वपूर्ण ठाउँमा छ र हब बन्छ’ उनले भने-‘तर, छिमेकीहरु नबनोस् भन्ने ठान्छन् । जब हामीले काम थाल्छौं एसआइएको विरुद्ध कोही बोलेछन् भने ठान्नुस्, यो कसैको प्रयोजित हो ।’
    आफू मन्त्री भए लगतै फास्टट्राक, त्रिभुवन अतराष्ट्रिय विमानस्थल (टीआइए) र एसआइए एउटै प्याकेजमा बनाउन तथा टीआइए र एसआइए एउटै प्याकेजमा बनाउनु पर्छ भन्नेहरु आएको उनले सुनाए ।
‘यो नबनाउनका लागि हो । तीनबटा छुट्टा छुट्टै हुनुपर्छ, कुनै हालतमा पनि प्याकेजमा हुँदैन’ नागरिक उड्डयन मन्त्री पोखरेलले भने-‘मैले कसैले यस्तो प्रस्ताव ल्याऐ मन्त्रालय छिर्न दिइन्न भनेको छु ।’
   भारततर्फ संकेत गर्दै मन्त्री पोखरेलले भने-‘एउटै मुलुक नबनोस् भन्ने चाहेको छ ।’
नागरिक उड्डयन मन्त्री पोखरेलले भारतको अघोषित नाकाबन्दीले नेपालमा हवाइ क्षेत्र बलियो चाहिन्छ भन्ने सन्देश दिएको बताए ।