सिमरा गोल्डकपको उपाधी हेटौडाले उचाल्यो

निजगढसमाचार,सिमरा, २९ फाल्गुन 
बिमल रानाको ह्याट्रिकको मद्यतले रुपन्देही ११ लाई पराजित गर्दै हेटौडाको विजय युथ क्लबले सिमरामा जारी मोफसलकै सर्वाधिक पुरस्कार राशीको रुस्लान सातौ सिमरा गोल्डकपको उपाधी जितेको छ ।
सिमरा रंगशालामा शनिवार भएको फाईलन भिडन्तमा रुपन्देहीलाई ४–० ले पराजित गर्दै हेटौडाले पहिलो सहभागितामै उपाधी उचालेको हो ।
उपाधीसंगै हेटौडाले पाच लाख ५१ हजार नगद पुरस्कार प्राप्त गरेको छ । उपविजेता रुपन्देहीले भने दुई लाख ५० हजारमै चित्त बुझाएको छ ।
रोमाञ्चक फाईलन भिडन्तको २१ औं मिनेटमा बिमल रानाले गोल गर्दै टिमलाई अग्रता दिलाएका थिए । सुनिल बलले प्रहार गरेको कर्नर बललाई सदुपयोग गर्दै रानाले हेड गर्दै गोल गरेका हुन् ।
खेलको सुरुवातलाई हेटौडालाई दवावमा राख्दै थुप्रै अवसर बनाएको रुपन्देही गोल गर्न चुकिरहेका बेला हेटौडाले अग्रता लिएको हो । रुपन्देहीका गणेश खड्काले सुरुवातमै गोल गर्ने अवसर चुकाएका थिए ।
दोस्रो हाफमा लय समातेको हेटौडाले खेलको दोस्रो हाफमा तीन गोल थप्दै फराकिलो जित आत्मसाथ ग¥यो । लगातार दवाव सिर्जना गरेको हेटौडाले खेलको ५८ औं मिनेटमा अग्रता दोब्बर पारेको थियो । सुनिल बिकको पासलाई सदुपयोग गर्दै बलले अग्रता दोब्बर पारेका हुन् । त्यसको एक मिनेट बित्न नपाउदै बिमलले ब्यक्तिगत दोस्रो टिम तथा टिमका लागि तेस्रो गोल गरे । बिमलको तेस्रो गोलसंगै हेटौडाले खेल नियन्त्रणमा लिन सफल भएको थियो ।
फिनिसिङमा कमजोर देखिएको रुपन्देहीको रक्षापंक्ती सम्हालिन नसक्दा हेटौडाले चौथो गोल ७९ औं मिनेटमा गरेको हो । बिमल रानाले ब्यक्तिगत तेस्रो गोल गर्दै ह्याट्रिक पुरा गरेका थिए । बिमलको प्रतियोगितामा यो चौथो गोल हो । चार गोल गरेका बिमलले सर्वाधिक गोलकर्ताको उपाधीसहित १५ हजार नगद पाए ।
बिमलनै प्रतियोगिताको सर्वोत्कृष्ट खेलाडी चुनिए । उनले सुजुकी मोटरसाईकल प्राप्त गरे । प्रतियोगिताको उत्कृष्ट गोलरक्षक हेटौडाका अशोक बराल र  र प्रशिक्षक सुविन घिमिरे घोषित हुदा अन्य बिधाको पुरस्कार रुपन्देहीका खेलाडीले हात पारे । उत्कृष्ट मिडफिल्ड रुपन्देहीका शिव श्रेष्ठ, उत्कृष्ट डिफेन्स देवेन्द्र तामाङ, उत्कृष्ट फरवार्ड योगेश गुरुङ घोषित हुदै जनही १५ हजार प्राप्त गरेका छन् । प्रतियोगिताको म्यान अफ दि म्याच हेटौडाका सुसन लामा घोषित भए । उनले तीन हजार नगद प्राप्त गरे ।
प्रतियोगिताको उपाधी बिजेता र उपबिजेतालाई एन्फाका कार्यवाहक अध्यक्ष नरेन्द्र श्रेष्ठ, आयोजक नव जागृति युवा क्लबका अध्यक्ष कामिस मियालगायतले पुरस्कार तथा ट्रफि वितरण गरेका थिए । फाल्गुन २० गते सुरु भएको प्रतियोगितामा ए डिभिजनका पाच सहित १० टिमको सहभागिता रहेको थियो ।